Walo pa ka mga Filipino caregivers gikan sa Israel ang nag-abot sa pungsod.
Sa isa ka pahayag, ginkumpirmar sang Department of Migrant Workers (DMW) nga naghugpa ang mga repatriated Filipinos sa Ninoy Aquino International Airport (NAIA) sang Miyerkules sang gab-i.
Gin-abi-abi sila sang mga opisyales gikan sa Department of Migrant Workers (DMW), Department of Social Welfare and Development (DSWD), Overseas Workers Welfare Administration (OWWA) kag mga medical teams gikan sa Manila International Airport Authority.
Ginhatagan sila sang temporaryo nga puluy-an, transportasyon kag pagpa-check-up sa ikaayong lawas.
Nagpasalig man ang DMW kag OWWA nga magahatag sang livelihood, employment kag health assistance para sa mga Filipino returnees.
Ini na ang ika-38 nga batch sang mga OFWs nga ginpabalik halin sa Israel humalin sang ginsugdan sang gobyerno ang ila voluntary repatriation program kasunod sang Oktubre 7 nga pag-atake sang 2023.
Ini na ang ikaduha nga grupo nga ginpabalik humalin sang nagbayluhanay sang missiles kag air strikes ang Iran kag Israel sang Hunyo 13 sini nga tuig antes ginpatuman ang ceasefire sang Hunyo 24, nga nagtapos sang ginatawag nga “12 days of war” sa tunga sang duha ka pungsod.
Sa kabug-usan, base sa datos gikan sa Embahada sang Pilipinas sa Tel Aviv, 1,333 ang napauli gikan sa Israel halin Oktubre 7, 2023 tubtob Hunyo 12, 2025.
