9 ka mga indibidwal, patay sa pagkarumpag sang tulay sa India

Naglab-ot sa sa siyam ka tawo ang napatay matapos nga narumpag ang tulay sa India.

Natabo ang insidente sa Vadodara district, Guijarat state sa Western India.

Suno kay Health Minister Rushikesh Patel, pila ka mga salakyan ang nagalabay sang narumpag ang bahin sang tulay.

May mga tawo pa nga nahulog sa suba kun sa diin gilayon sila nga ginluwas sang nagresponder nga mga otoridad.

Ginapahayag nga bangud sang pila ka adlaw nga pag-ulan, nagrumpag ang bahin sang tulay nga gintukod sang 1985.

Nagpabutyag man sang simpatiya ang Indian Prime Minister Narendra Modi sa mga biktima kag nagpanawagan sang maid-id nga imbestigasyon sa pagkarumpag sang amo nga tulay.