Patay ang siyam ka indibidwal kag madamo pa ang nagkalapilasan sa natabo nga pagginutok sa isa ka konsiyerto sa Democratic Republic of Congo.
Nagluntad ang insidente sa konsiyerto sang gospel singer kag pastor nga si Mike Kalambay sa sulod sang 80,000-seater nga Martyr Stadium sa Kinshasa.
Ginapahayag nga sobra nga naggilinutok ang mga tawo sa nasambit nga lugar nga kun sa diin indi na makaginhawa ang iban.
Kalakip sa ginbawian sang hulam nga kabuhi ang 10-anyos nga bata.
Ginpahayag ni Kinshasa governor Daniel Bumba nga ang sobra nga paggilinutok ang siya nga rason sang nasambit nga kamatayon sang mgaa biktima.
Ginpanginwala naman sang organizers ang akusasyon kag ginpahayag nga nagdanat lamang sa 30,000 ang mga indibidwal nga naglantaw.
Nagahiwat na sang imbestigasyon ang mga otoridad sa nasambit nga insidente.
