Pilas ang naangkon sang duha ka lalaki nga sakay sang motorsiklo matapos nabunggu-an sang pick-up truck sa Sitio Ilawod, Barangay Parian banwa sang Sigma.
Ginkilala ang mga biktima kay alyas “Ed” kag alyas “John”, lunsay mga residente sang Barangay Agbanban, banwa sang Panay samtang ang driver sang Pick-Up Truck ang ginkilala kay alyas Leo.
Sa impormasyon nga nakuha sang Bombo Radyo sa Sigma MPS, ginpahayag nga samtang ginasubay sang duha ka mga biktima ang dalanon gikan sa banwa sang Sigma padulong kun tani sa banwa sang Ivisan sang hinali ini nga ginbunggu-an sang nagasunod sa ila nga pick-up truck.
Bangud sa impak sang pagkabunggo nagbaliskad ini sa tunga sang karsada rason nga nag-angkon sang patal nga pilas sa magkatuhay nga bahin sang ila nga lawas.
Samtang, gilayon ini nga ginpadangat sa ospital ang mga biktima para sa nagaka-igo nga pagbulong.
Sa karon, nagapabilin sa kustodiya sang Sigma Municipal Police Station si alyas Leo kag ang imbolbado nga salakyan para sa nagakaigo nga disposisyon.
