CAPIZ-May 424 ka pamilya sa Barangay Olotayan, Roxas City, ang nakabaton sang ayuda halin sa Gobyerno Probinsyal sang Capiz sa ginpatigayon nga distribusyon sang mga kinahanglanon sa adlaw-adlaw nga pagpangabuhi sang Oktubre 21, 2026.
Ang paghatag sang bulig gintinguhaan paagi sa Task Force Pagdumdum kag Provincial Disaster Risk Reduction and Management Unit (PDRRMU), sa pagpakig-angot sa Office of Civil Defense Region VI (OCD VI) kag Philippine Coast Guard, agud mahatagan sang suporta ang mga pumuluyo sang nasambit nga komunidad.
Ang tagsa ka benepisyaryo nga pamilya nakabaton sang 10 ka kilo nga bugas, food packs nga may 15 ka delata, lima ka twin-pack sang kape, lima ka pakete sang noodles, kag hygiene kit. Ang mga ayuda ginpasalamatan sang mga pumuluyo nga nagakinahanglan sang dugang nga bulig para sa ila adlaw-adlaw nga kinahanglanon.
Importante ang amo nga paghatag sang ayuda sa mga pumuluyo sang Olotayan, nga mahimo maapektuhan sang malain nga tyempo kag mataas nga balud bangud sa ila kahimtangan bilang komunidad nga malapit sa baybayon. Paagi sa distribusyon, ginpaabot ang dugang nga suporta sa mga pamilya sa pag-atubang sang mga kabudlayan sa ila pagpangabuhi.
Ginpangunahan ang aktibidad ni Atty. Luvim D. Amores sang Task Force Pagdumdum kag PDRRMU Head Atty. Sheila Artillero, upod ang mga katapo sang Philippine Coast Guard. Nabuligan man ang pagpatigayon sang distribusyon paagi sa koordinasyon sang Olotayan Fisherfolks Community Association (OFCA) sa talatapan ni Governor Fredenil H. Castro.
Ang paghatag sang ayuda kabahin sang pagpanikasog sang Gobyerno Probinsyal sang Capiz nga mapalapit ang bulig sa mga pumuluyo nga nagakinahanglan, ilabi na sa mga komunidad nga nagaatubang sang mga peligro kag kabudlayan sa pangabuhi.
