Arestado ang isa ka 40 anyos nga babaye nga ginakabig nga Top 5 Most Wanted Person sa municipal level sa banwa sang Pontevedra, Capiz, matapos serbihan sang Warrant of Arrest sa Barangay Malag-it, Pontevedra, pasado alas-8 sang gab-i, Oktubre 25, 2026.
Ginkilala ang akusada sa alyas nga Inday Girom, residente sang Barangay Bantigue, Pontevedra, Capiz.
Sa impormasyon nga nakuha sang Bombo Radyo sa Pontevedra MPS, gin-aresto ang akusada paagi sa pagserbi sang Warrant of Arrest sa iya kaso nga Qualified Theft, sa idalom sang Criminal Case No. C-586-26, may kaangtanan sa Article 310 kag Article 309 sang Revised Penal Code, nga gin-amendar sang Republic Act No. 10951.
Ang warrant gin-isyu ni Hon. Joy Rubi Infante-Guilot, Presiding Judge sang Regional Trial Court, Sixth Judicial Region, Branch 18, Roxas City, Capiz, sang Oktubre 6, 2026. Ginpahamtang ang piyansa sa kantidad nga ₱40,000 para sa iya temporaryo nga kahilwayan.
Sa karon, yara na sa kustodiya sang Pontevedra Municipal Police Station ang akusada para sa nagakaigo nga disposisyon sang iya kaso.
