Ginakabig sang mga Barangay officials sang Barangay Baybay, Roxas City, nga dako nga bulig sa mga pumuluyo ang libre nga gamot program, ilabi na sa mga maintenance nga bulong sang mga tigulang kag mga bitamina para sa kabataan.
Sa interview sang Bombo Radyo kay Barangay Kagawad Earl Valencia, iya ginpahayag nga paagi sa amo nga programa, mabuligan ang mga pumuluyo nga nagakinahanglan sang bulong para sa ila pagmintinar sang ikaayong lawas.
Suno kay Valencia, isa sa mga kinahanglanon sa pagkuha sang bulong ang reseta sang doktor ukon blue card agud maipakita ang kwalipikasyon sang benepisyaryo.
Dugang pa sini, nagalakip man sa mga benepisyaryo sang programa ang mga kabataan nga nagakinahanglan sang bitamina kag iban pa nga bulong, lakip ang mga may balatian pareho sang hapo.
