Arestado ang tatlo ka mga lalaki, lakip ang isa ka menor de edad, bangud sa anti-illegal gambling operation nga ginpatigayon sang mga pulis sa Barangay Malag-it, Pontevedra, Capiz.
Base sa nakuha nga impormasyon sang Bombo Radyo, ginkilala ang mga nadakpan nga sanday Alyas Jojo, 31 anyos, isa ka mamumugon kag residente sang Barangay Malag-it; Nono, 23 anyos, estudyante kag residente sang Barangay Tacas; kag si Janjan, isa ka menor de edad kag estudyante nga residente man sang nasambit nga barangay.
Ginpatigayon ang operasyon sang mga personnel sang Pontevedra Municipal Police Station (MPS), sa pagpanguna ni PCPT Maria Fe T. Umiten, officer-in-charge, matapos nga ginaalegar nadakpan ang mga suspetsado nga nagapatigayon sang iligal nga sugal pinaagi sa spider fighting ukon nagapakig-away sang damang gamit ang pusta.
Suno sa report sang kapulisan, nagtaya pa ang isa ka operatiba nga nagserbe nga poseur-bettor agud mahibaluan ang partisipasyon sang mga suspetsado sa nasambit nga iligal nga aktibidad.
Nakumpiskar sa tion sang operasyon ang apat ka plastic cases nga may unod nga damang, siyam ka kahon sang posporo, kwarta nga gingamit sa pusta, digital weighing scale, improvised stick, kag improvised wooden spider-fighting stand.
Nagapangatubang naman sang panumbungon ang mga suspetsado may kaangtanan sa paglapas sa Presidential Decree No. 1602 ukon iligal nga pasugal.
