CAPIZ-Masobra 2,000 ka benepisyaryo sa banwa sang Dumalag ang nagbaton sang tag-10 ka kilo nga libre nga bugas sa ikatlo nga hugna sang distribusyon sang Gobyerno Probinsyal sang Capiz nga ginpatigayon sa Ricardo H. Castro Jr. Memorial Hall subong nga Oktubre 26, 2026.
Kabahin ang distribusyon sang padayon nga programa sang administrasyon ni Governor Fredenil H. Castro sa paghatag sang bulig sa mga pumuluyo nga nagaatubang sang kabudlayan bangud sa pagsaka sang presyo sang mga nagapanguna nga balaklon kag iban pa nga epekto sang krisis sa gatong kag enerhiya.
Nag-upod sa aktibidad si Second District Congresswoman Inday Baby Jane T. Castro, Dumalag Mayor Khuku Castro kag mga katapo sang Sangguniang Bayan. Gindayaw man sang mga benepisyaryo ang presensya ni Governor Castro nga naghatag sang tion sa pagpanamyaw kag pakig-angot sa mga pumuluyo.
Ang ikatlo nga hugna sang distribusyon ginpatigayon paagi sa pagpakig-angot sang Gobyerno Probinsyal sang Capiz, Provincial Social Welfare and Development Office (PSWDO) kag Task Force Pagdumdum agud mahatagan sang dugang nga suporta ang mga panimalay nga nagakinahanglan.
Paagi sa pagpanagtag sang bugas, ginatuyo sang programa nga mabuligan ang mga benepisyaryo sa ila panguna nga kinahanglanon sa pagkaon kag maminusan ang ila galastuhan sa panimalay, ilabi na sa tunga sang padayon nga pagsaka sang presyo sang mga balaklon.
