Gin-anunsyo ni US Secretary of War Pete Hegseth ang pagdugang sang pondo para sa kooperasyon sa seguridad agud mapadasig ang modernisasyon sang Armed Forces of the Philippines (AFP) kag mapabaskog ang interoperability sang duha ka pungsod.
Ang anunsyo ginhimo sa tion sang isa ka bilateral meeting nga ginhiwat sa tunga ni Hegseth kag Department of National Defense (DND) Secretary Gilberto Teodoro Jr., bisan pa nga wala gintumod sang US Department of War ang eksakto nga kantidad sang dugang nga pundo.
Nag-ugyon ang duha ka opisyal nga padasigon ang modernisasyon sang command and control systems agud mapaayo ang real-time nga koordinasyon sa tunga sang Pilipinas kag Estados Unidos sa patag sang depensa.
Gintalakay man sa pagsinapol ang pagpauswag sang dugang nga mga pasilidad kag kritikal nga imprastraktura sa idalom sang Enhanced Defence Cooperation Agreement (EDCA).
Samtang, ginkumpirmar naman sang China nga ang ila Defence Attaché lamang ang magatambong sa ADMM-Plus sa Cebu nga ginakabig sang madamo nga pinakamanubo nga lebel sang ila partisipasyon humalin sang 2010.
Nagapabilin nga nakatutok ang mga lider sang depensa sang ASEAN sa pagpabaskog sang seguridad sa kadagatan sa tunga sang nagapadayon nga tensyon sa West Philippine Sea kag South China Sea.
Sa pihak nga bahin, pormal man nga ginpabaskog sang Philippine Coast Guard (PCG) kag BFAR ang ila suporta sa mga Pilipino nga mangingisda sa Bajo de Masinloc paagi sa paghatag sang libre nga krudo.
Ginpasiguro sang DND nga ining tanan nga bilateral kag multilateral nga mga kasugtanan sa depensa nagatuyo sa pagmentinar sang kalinong, kalig-on, kag pagbato sa kalamidad sa bug-os nga rehiyon.
