Nagpanawagan ang People’s Budget Coalition sa Senado nga usisaon sang maayo ang tatlo ka sahi sang red flags ukon makaduluda nga alokasyon sa ginaduso nga 2027 national budget.
Sa interview sang Bombo Radyo kay Mary Abigail Modales, National Coordinator sang People’s Budget Coalition, ginpaathag sini ang concerns sang grupo angot sa pondo nga yara sa ginaduso nga national budget.
Suno kay Modales, lakip sa mga dapat usisaon amo ang ginatawag nga soft pork, hard pork, kag shadow pork, nga suno sa grupo nagakinahanglan sang maid-id nga pag-usisa agud masiguro ang insakto nga paggamit sang pondo sang gobyerno.
Magluwas sini, importante nga siguraduhon nga may yara sang bastante nga dokumentasyon, maathag nga basehan, kag transparency sa mga proyekto nga nalakip sa national budget agud malikawan ang posible nga pag-abuso sa pundo sang publiko.
Nagalaum ang grupo nga tun-an sang maayo sang Senado ang kaangay nga mga alokasyon antes aprobahan ang 2027 national budget, agud masiguro nga ang pundo sang gobyerno magakadto sa mga programa nga matuod-tuod nga makabenepisyo sa mga pumuluyo.
