Ginpanindugan sang pila ka mga opisyal sang Sangguniang Kabataan (SK) nga ang pagpalawig sang ila termino ang isa sa mga rason kon ngaa nagdesisyon ang pila ka mga opisyal nga mag-resign sa ila posisyon.
Sa interview sang Bombo Radyo kay Niño Angelo Dela Paz, SK Federation President sang Presidente Roxas, Capiz, iya ginpahayag nga may pila ka mga indibidwal nga nagdalagan kag napilian sa amo nga posisyon nga wala ginalauman nga mapalawig pa ang ila termino sa serbisyo.
Suno kay Dela Paz, kalabanan sa mga SK officials ang yara na sa stage nga mangin young adults, sa diin madamo sa ila ang bag-o lang nakatapos sa kolehiyo kag kinahanglan nga magpangita sang permanente nga trabaho agud masuportahan ang ila mga kinahanglanon.
Pahayag pa niya, naintindihan sini ang desisyon sang pila ka mga SK officials nga magbiya sa ila posisyon agud nga magtutok sa pagpangita sang trabaho kag pagtukod sang ila kaugalingon nga career.
Apang, nagalaum ang natungdan nga sa pihak sang mga pagpanghangkat nga gina-atubang sang mga opisyal sang Sangguniang Kabataan, magapangibabaw ang matuod nga espiritu sang pagserbisyo sa ila mga nasakupan kag padayon nga pagtuman sang ila responsibilidad sa komunidad.
