Nagpanawagan ang BAYAN Panay sa gobyerno nga gilayon nga magpatuman sang konkreto nga mga tikang agud madugangan ang job opportunity kag masabat ang nagapadayon nga unemployment sa pungsod.
Sa interview sang Bombo Radyo kay Mr. Elmer Forro, Secretary General sang BAYAN Panay, ginpanindugan sini ang pagkinahanglan sang mga programa nga makahatag sang dugang nga oportunidad sa trabaho para sa mga Pilipino.
Kasunod ini sang gamay nga pagsaka sang unemployment rate sa Pilipinas sa 5.4% sadtong Setyembre, katumbas sa 2.86 million ka unemployed Filipinos suno sa Philippine Statistics Authority ukon PSA.
Dugang pa ni Forro, dapat seryosohon sang gobyerno ang problema sa unemployment kag gilayon nga aksyonan agud makatuga sang mas disente nga trabaho kag masiguro ang kaayuhan sang mga pumuluyo.
Ginhatagan pagtamod sang BAYAN Panay nga padayon nila nga iduso ang panawagan para sa konkreto nga mga programa kag solusyon nga makahatag sang nagakaigo nga trabaho kag mas maayo nga kondisyon para sa mga mamumugon nga Pilipino.
