Nagapatigayon sang regular checkpoints ang Roxas Component City Police Station sa nagkalain-lain nga entrance kag exit points sang syudad agud mapunggan ang krimen kag masiguro ang seguridad sang publiko.
Sa interview sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas Component City Police Station, iya ginpahayag nga kabahin ini sang programa nga ginapatuman ni PCOL David L. Cachumbo Jr. para mapabaskog ang police visibility kag crime prevention.
Suno kay Tomagtang, ginapatigayon ang checkpoints halin alas-10 sang gab-i tubtob alas-2 sang kaagahon kag alas-4 tubtob alas-6 sang kaagahon, nga ginadugangan man sang mobile kag motorcycle patrol.
Base sa ila obserbasyon sa halos anum ka bulan nga operasyon, madamo nga motorista ang nadakpan nga wala sang lisensya, rehistro sang motorsiklo kag wala nagasuksok sang helmet.
Dugang pa niya, ginapabaskog man ang pagbantay kontra sa illegal drag racing, ilabi na sa Airport Road, kag ginapanawagan ang tanan nga motorista nga magsunod sa traffic regulations kag magmaneho sang responsable agud malikawan ang aksidente.
