Ginasuportahan sang Bureau of Fire Protection (BFP) Roxas City ang pagpartisipar sang ila mga personnel sa mga programa parte sa mental health awareness.
Sa interview sang Bombo Radyo kay Senior Fire Officer II Sussie May Magan, Public Information Officer sang Roxas City Fire Station, iya ginpahayag nga importante amo nga aktibidad bangud adlaw-adlaw nga nagapatubang ang mga personel sang nagkalain-lain nga emerhensya nga mahimo makaapekto sa ila mental health.
Suno kay Magan, nakoordinar man ini sa mga eksperto kaangay sang psychologist kag counselor agud mahatagan sang nagakaigo nga suporta ang mga personnel nga nagakinahanglan sang counseling kag iban pa nga bulig.
Ginapahanumdom man sang BFP ang ila mga personnel nga importante nga atipanon ang ila mental kag physical health kag indi dapat maghadlok nga magpangayo sang bulig kon may ginabatyag nga problema sa ila panghunahuna kag balatyagon.
