Ginkumpirmar sang Department of Foreign Affairs (DFA) nga magatambong si United States President Donald Trump sa ASEAN-US Special Summit nga pagahiwaton sa Pilipinas sa Nobyembre 17.
Ang tatlo ka adlaw nga pagtililipon pagahiwaton sa Nobyembre 15 tubtob 18 sa Philippine International Convention Center ukon PICC sa syudad sang Pasay, sa diin magatipon ang mga lider sang mga pungsod sa Southeast Asian kag ang ila mga dialogue partners agud istoryahan ang importante nga mga isyu sa rehiyon kag pangkalibutanon.
Pagapangunahan ni President Ferdinand Marcos Jr. ang nasambit nga pagtililipon sa diin ang mga prayoridad sang ASEAN, lakip na ang nagapadayon nga sitwasyon sa Myanmar ang mangin isa sa mga nagapanguna nga topiko nga paga-istoryahan.
Ginalauman man nga magatambong ang mga lideres gikan sa Vietnam, Cambodia, Brunei, Indonesia, Laos, Malaysia, Singapore, Thailand kag Timor-Leste, samtang ang director general sang ASEAN Affairs Department of the Foreign Ministry ang magatiglawas sa Myanmar.
Suno sa DFA, katuyuan sang nasambit nga summit amo ang pagpabaskog sang relasyon kag kooperasyon sang ASEAN kag sang iya dialogue partners sa pagsabat sa rehiyonal kag pangkalibutanon nga pagpanghangkat.
Sa Nobyembre 17, pangunahan man ni Marcos ang 29th ASEAN Plus Three Summit kag 21st East Asia Summit antes ang turnover sang ASEAN chairmanship sa Singapore kag ang ASEAN-US Special Summit nga pagatambungan ni Trump.
