Ginpabaskog pa sang Philippine National Police (PNP) ang pagpatrolya sa sulod kag sa palibot sang mga mayor nga shopping malls agud mapabilin ang katawhay kag seguridad samtang nagasugod na ang holiday season.
Suno kay PNP Chief Police General Jose Melencio Nartatez Jr., gin-reorganize sang nagkalain-lain nga police units ang ila tagsa ka deployment plans agud epektibo nga masabat ang ginalauman nga pagdagsa sang mga konsumidor sa mga establisyemento.
Ginhatagan pagtamod ni Nartatez nga luyag nila nga masiguro ang matawhay nga selebrasyon sang mga pumuluyo pinaagi sa intensified police visibility kag foot patrol agud masolbar ukon malikawan ang anuman nga posible insidente sang krimen.
Sa nasambit nga sistema, magabukas ang mga mall humalin alas 11 sang aga tubtob alas 11 sang gab-i sa mga weekdays, samtang ginadumilian man ang mall-wide sales sa sini nga mga inadlaw agud mapahagan-hagan ang posible mabug-at nga trapiko.
