Dismayado ang prosecution team sa mga testigo kag ebidensiya nga ginpresentar sang defense team ni Vice President Sara Duterte sa impeachment trial.
Suno kay House Lead Prosecutor Gerville Luistro, ginapaabot nila nga mas mabaskog kag eksplosibo ang mga testimonya kag ebidensiya sang depensa matapos ang tatlo ka semana nga break sa hearing.
Apang, gintawag ni Luistro nga daw kaangay lamang sang “watusi” ang kabaskugon sang presentasyon sang depensa bangud wala nila nakita ang klase sang ebidensiya nga ila ginapaabot, ilabi na sa isyu sang ginapatihan nga unexplained wealth sang bise presidente kag iya bana.
Nahibaluan nga ginpresentar sang defense team bilang mga testigo sanday City Assessors Jaime Adali kag John Kenneth Enumerables, City Accountant Vingelin Bajan, Atty. Suzette Balucanag-Punay, Atty. Anel Martin Antero kag Chadrin Parian.
Samtang, wala sang impeachment trial nga ginpatigayon, matapos maghingyo ang depensa nga kanselahon ang hearing bangud sa ASEAN Summit kag deklarasyon sang holidays, kag wala man sang naka-schedule nga testigo para sa amo nga petsa.
