Indi na kinahanglan nga magpresentar sang dugang nga ebidensya ang House prosecution panel may kaangtanan sa alegasyon sang wala mapaathag nga manggad batuk kay Vice President Sara Duterte sa nagapadayon nga impeachment trial.
Suno kay Atty Benjamin “Jay” Tolosa Jr., legal spokesperson kag private prosecutor sang House prosecution panel, kumpiyansa ang ila bahin sa mga dokumento kag ebidensya nga ila ginpresentar sa impeachment court agud pamatud-an ang ginaalegar undeclared wealth kag assets nga nagabalor sang masobra P800 million pesos nga ginaangot sa Bise Presidente kag sa iya asawa nga si Atty. Manasseh “Mans” Carpio.
Suno kay Tolosa, bastante na ang ila ginpresentar nga ebidensya para sa ila nga bahin antes pormal nga ginpahuway ang kaso sang prosecutiom. suno sa iya, turno na sang depensa nga sabton kag pamatukan ang amo nga mga alegasyon.
Madumduman nga ang amo nga kantidad ang naghalin sa pag-analisar sang prosecution witness kag forensic accounting expert nga si Alexander Cabrera sa bank records, tax documents, corporate records kag Statements of Assets, Liabilities and Net Worth (SALN) sang mag-asawa nga Duterte-Carpio humalin 2022 tubtub 2025.
Sa pihak nga bahin, ginpanindugan ni House Deputy Speaker kag Iloilo Representative Janette Garin nga mismo si Duterte ang pinakamaayo nga makapaathag sang mga alegasyon kag makapanghiwala sa mga alegasyon batok sa iya.
