Gapanawagan si Senator Francis “Kiko” Pangilinan sa Philippine National Police (PNP) nga ipatuman ang maximum tolerance kag respetuhon ang kinamatarong sang mga pumuluyo nga maghimo sang malinong nga protesta.
Ginpabutyag man sang senador nga importante nga mapabilin ang kalinong kag seguridad sa pungsod, samtang ginapasiguro man nga protektado ang kinamatarong sang kada Pilipino nga maluwas nga makapahayag sang ila opinyon kag balatyagon.
Suno kay Pangilinan, pareho lamang nga mga Pilipino ang mga pulis kag ang mga nagaprotesta nga may pareho nga handum, lakip na ang may bastante nga pangabuhi, hilway kag luwas nga komunidad kag mas maayo nga palaabuton para sa ila mga pamilya.
Bangud sini, ginpangabay niya ang mga pulis nga atubangon ang mga nagahimo sang malinong nga protesta nga may paghangop, pagpugong sang kaugalingon kag pagrespeto.
Dugang pa sang senador, wala sang rason nga ikahuya ang mga malinong nga protesta sa pag-abot sang mga lider kag delegate halin sa nagkalain-lain nga pungsod para sa ASEAN Summit.
Sa baylo, isa ini ka kahigayunan agud mapakita sa international community nga kabahin sang demokrasya sa Pilipinas ang kahilwayan sang mga pumuluyo nga magpahayag sang ila opinyon kag pagrespeto sa nagkalain-lain nga panan-aw.
Ginpabutyag man ni Pangilinan nga dapat masiguro ang kaluwasan sang tanan, samtang ginahatagan sang kahigayunan ang kada Pilipino nga mapaabot ang ila mga reklamo kag ginapanawagan.











