Panawagan sang pagpamatok sa Pax Silica Agreement ang sentro sang hublag-protesta nga ipatigayon sang Kabataan Partylist Panay.
Sa interview sang Bombo Radyo kay Arlie Bosque, Secretary general sang Kabataan Partylist Panay, iya ginpahayag nga ang ila nga pagpatigayon ang panawagan sang pagpahalin kay US President Donald Trump sa Pilipinas nga magapadulong para sa ASEAN Summit.
Suno kay Bosque, indi makatarungan ang kaundan sang agreement bangud tuman nga maapektuhan ang mga indigenous people, supply sang tubig kag palangabuhian sang mga tawo sa lugar.
Dugang pa sini, ginpahayag ni Bosque ang ila pagkadismaya sa administrasyon ni President Ferdinand Marcos Jr. bangud suno sa iya, may pondo ang gobyerno para sa kaangay nga mga aktibidad apang kulang naman ang ginahatag nga pondo para sa mga kinahanglanon sang ordinaryo nga pumuluyo.
Matandaan nga idungan man ang nasambit nga protesta sa pagselebrar sang National Students’ Day.











