Duha ka separado nga insidente sang pagpamusil ang natabo sa South Africa sang Domingo, Nobyembre 15, nga nagresulta sa kamatayon sang 17 ka tawo.
Una nga natabo ang pagpamusil sa sulod sang isa ka minibus sa probinsya sang KwaZulu-Natal, kun sa diin walo ka tawo ang napatay.
Suno sa lokal nga mga otoridad, nakabaton sila sang report parte sa pagpamusil sa amo nga lugar. Pag-abot sang kapulisan, nakita nila ang isa ka puti nga seven-seater nga salakyan nga may madamo nga marka sang bala. Sa sulod sini nakita ang walo ka lalaki nga may igo sang bala kag patay na.
Pagkaligad sang pila ka oras, isa naman ka pagpamusil ang natabo sa isa ka barung-barong sa western Pretoria, nga nagresulta sa kamatayon sang siyam ka tawo.
Nakita ang mga bangkay sang anum ka lalaki kag tatlo ka babayi sa isa ka informal settlement sa Atteridgeville. Suno sa isa ka residente sang komunidad, abi nila nga daguob kag kilat lamang ang mga tunog nga ila nabatian sang gab-i.
Suno sa kapulisan sang South Africa, wala sang kaangtanan ang duha ka insidente, apang padayon nila ini nga ginaiimbestigaran agud mahibaluan ang motibo sa likod sang pagpamusil.
Naglunsar na man ang kapulisan sang pagpangita sa mga suspetsado nga responsable sa duha ka insidente.
Samtang, indi na bag-o sa South Africa ang mga insidente sang pagpamusil. Sang Setyembre sini nga tuig, may naireport man nga mass shooting sa nasud.











