-- ADVERTISEMENT --

Nagpahayag sang pagkabalaka si Davao City 1st District Representative Paolo “Pulong” Duterte parte sa report nga ginapamahog kuno ang kabuhi sang anay household staff ni Vice President Sara Duterte.

Suno kay Duterte, kon matuod ang mga reklamo, seryoso ini nga butang nga may kaangtanan sa seguridad kag kinamatarong sang anay empleyado. Ini kasunod sang pahayag ni Atty. Paolo Panelo, legal counsel ni VP Sara, nga nakabaton kuno ang Bise Presidente sang mensahe halin sa anay household staff nga nagapangayo sang bulig bangud yara kuno ini sa kustodiya sang pila ka persona kag ginapamahog ang iya kabuhi.

Ginkompara man ni Duterte ang insidente sa nagligad nga kaso nga may kaangtanan kay Jefry Tupas. Suno sa iya, may kaanggid kuno nga mga hitabo sa duha ka insidente nga kinahanglan gilayon nga maathag.

Ginpabutyag man sang kongresista nga kon may kaangtanan ang National Bureau of Investigation (NBI) ukon iban pa nga ahensya sang gobyerno, dapat maathag sa publiko ang ila papel sa amo nga hitabo. Kinahanglan man nga manabat ang bisan sin-o nga mapamatud-an nga may sala.

Dugang pa niya nga indi dapat gamiton ang mga ahensya sang gobyerno bilang instrumento sa pulitika.

-- ADVERTISEMENT --