-- ADVERTISEMENT --

Ginsita ni House impeachment prosecutor kag Manila 3rd District Rep Joel Chua ang kampo ni Vice President Sara Duterte bangud sa baylo nga sabton ang mga alegasyon batok sa Vice President, mas ginatutukan sini ang pagpagwa sang mga daan nga video gikan sa impeachment trial ni anay Chief Justice Renato Corona.

Suno kay Chua, daw kaangay nga ang tuyo lamang sang depensa amo ang pagpapogi sa ila mga supporters kag ipresentar ang ila kaugalingon nga narrative agud mapahilayo ang atensyon sang publiko sa mga isyu nga gina-atubang ni Duterte.

Ini ang gin-ugyunan sang House prosecution spokesperson kag Lanao del Sur Rep. Zia Alonto Adiong, nga nagpanawagan sa Bise Presidente nga maghatag sang direkta kag klaro nga paathag sa mga alegasyon sa baylo nga magsalig sa pagpagwa sang cut and spliced ​​nga mga video.

Matandaan nga ginpaguwa sang defense lawyer nga si Atty Mark Vinluan ang daan nga mga pahayag sang nagtaliwan nga Senador Miriam Defensor-Santiago kag anay Chief Justice Corona angut sa ginaalegar pressure sa judiciary sadtong 2011.

Padayon nga ginapangayo sang prosekusyon ang paathag gikan sa kampo ni Duterte angot sa ginabulubanta nga ₱817.87 million nga undeclared wealth kag kita sang Bise Presidente kag sang iya asawa nga si Atty. Manases Carpio halin 2022 tubtob 2025.

-- ADVERTISEMENT --