Ginbatikos ni House impeachment prosecutor kag Manila 3rd District Representative Joel Chua ang kampo ni Vice President Sara Duterte matapos nga nagapokus lamang ini sa pagpakita sang mga daan nga video halin sa impeachment trial ni anay Chief Justice Renato Corona, imbes nga sabton ang mga alegasyon batok sa Bise Presidente.
Suno kay Chua, klaro nga nagapakita lamang sang pa-pogi kag nagahimo sang kaugalingon nga naratibo ang depensa para sa ila mga supporters agud ilikaw ang atensyon sang publiko sa matuod nga isyu.
Nagsuporta man sa pahayag ni Chua si House prosecution spokesperson kag Lanao del Sur Representative Zia Alonto Adiong, nga gapanawagan sa depensa nga maghatag sang direkta nga pagpaathag imbes nga magpakita sang mga gin-utod-utod nga video ukon “spliced videos.”
Ginpahayag ni Adiong nga bilang isa ka opisyal nga napilian sang katawhan, katungdanan ni Duterte nga maghatag sang husto nga impormasyon sa publiko.
Ini matapos nga ginpakita ni defense lawyer Atty. Mark Vinluan ang mga daan nga pahayag sanday late Senador Miriam Defensor-Santiago kag anay Chief Justice Renato Corona nahanungod sa ginapahayag nga pagpamigos sa Judiciary sang 2011. Ginpresentar ini samtang ginapamangkot ang testigo nga si Atty. Rainer Dela Fuente, anay imbestigador sang Anti-Money Laundering Council ukon AMLC, nahanungod sa unexplained wealth case sa idalom sang Article II.
Padayon nga ginahangkat sang prosekusyon ang depensa nga direkta nga magpaathag nahanungod sa ginabulubanta nga P817.87 milyones nga wala nade klarar nga manggad kag kinitaan nanday Duterte kag sang iya bana nga si Atty. Manases Carpio halin 2022 tubtob 2025.











