Sa baylo nga kilig kag romantic nga wedding photos ang ma-capture sang kamera, daw aksidente pa nga nag-“take off” ang isa ka bride sa Istanbul, Turkey, matapos siya halos paluparon sang mabaskog nga hangin samtang nagapakuha sang laragway!
Makita nga nagapakuha sang laragway ang bride samtang nagakapot sa bouquet nga may dalagko nga beige balloons agud mangin mas matahum ang iya wedding photos.
Apang gulpi nga nagkusog ang hangin kag ginlupad ang mga balloons, nga halos nagdala man sa bride pakadto sa seawall.
Makita man sa video nga nagapangapkap kag nagapa-atras ang bride agud mapabilin ang iya balanse kag malikawan nga madala sang hangin.
Maayo na lamang kag madasig nga nakalab-ot ang photographer kag nasalo ang bride antes pa ini mabunggo sa building.
Bisan daw lapit na mangin flight attendant sa iya wedding shoot, natapos man gihapon ang photoshoot nga wala sang dugang nga insidente.
Sang ulihi, indi lang love story ang ila madumduman sa sini nga photoshoot, kundi pati ang bride nga dutayan lang na mangin first-class passenger nga wala nagbakal sang tiket!











