ROXAS CITY – Nagapangayo sang pasaylo sa mga pumuluyo nga apektado sang guba kag kaangay sang lamawan nga dalan sa Purok 3, Brgy. Libas palapus sa Sitio Tabay, Brgy. Barra sini nga syudad, ang chairman sang committee on infrastracture sang Sangguniang Panlungsod.
Sa interview sang Bombo Radyo kay City Councilor Midelo Ocampo, suno diri nga gintinguhaan man sini nga ipalab-ot sa iya mga kaupdanan sa City Council ang iya sini nga obserbasyon sa syudad ilabi na sa mga guba nga dalanon.
Apang, daw kaangay nga indi sini mabatyagan nga siya ang chairman sang nasambit nga komitiba matapos magtal-os kay city councilor John Paul Arcenas. Posible suno diri bangud nga iban ang iya ‘color’.
Kaangay sa iya ginasinggitan nga problema sa baha, may pondo man suno diri apang tubtob sa karon, wala ini gin-aksyonan.
Bangud sini, ginapalab-ot na lamang ni Ocampo ang iya nga obserbasyon sa mga karsadahon kag problema sa dalanon, pinaagi sa diskurso prebiliheyo, nga nagalaom nga masuportahan sang iya mga kaupdanan sa konseho.
