Nagalain ang buot sang tatlo ka mga senior citizen nagikan sa Barangay Balighot sa banwa sang Maayon matapos ginkakas sa social pension program sang Department of Social Welfare and Development (DSWD).
Ginkilala ang tatlo ka senior citizen nga sanday Reynaldo Dorado, 70-anyos, Consuelo Dador, 68-anyos kag Gen Desales, 67-anyos nga lunsay mga residente sang nasambit nga barangay.
Pahayag nina Dorado, Dador kag Desales, pito na ang mga ini ka tuig nga nagabaton sang amo nga ayuda apang sang damlag lang nga nag-release na sang amo nga assistance sa ila nga lugar, dako ang katingalahan kag ginkakibot sang mga ini nga wala na ini sila nalakip sa mga benepisyaryo nga magabaton sang amo nga ayuda.
Dugang pa sang mga ini, ginkakas ang ila nga pangalan sa amo nga listahan kag ginbuslan sang bag-o nga beneficiaries.
Ang ginatudlo nga rason sa ginhimo nga pagkakas sa pangalan sang mga ini sa listahan kay bangud may mga bata ini nga professional, nagatrabaho sa luwas sang pungsod kag dako ang ila sini nga balay.
Apang, suno sa mga ini masami naman ang mga ini nga mahatagan sang suporta sang ila mga kabataan bangud may tagsa naman ini ka mga pamilya nga ginasuportahan.
Ginpanugyanan ang mga tigulang nga gikakas sa program nga mahimo magreklamu sa opisina sang DSWD para maathagan sa natabo.
Sa karon, luyag sang mga senior citizen nga makabalik sa programa kag makabaton sang P3,000 nga pension para sa 3rd quarter sa sini nga tuig.
