ROXAS CITY, CAPIZ- Ginpatpat sang isa ka abogado ang proteksyon sa kinamatarong sang employer kag empleyado sa idalom sang Labor Code.
Sa interview sang Bombo Radyo kay Atty. Don Wade B. Comoro sang Integrated Bar of the Philippines-Capiz Chapter, iya ginpahayag nga ang mga layi sa pagpamugon sa Pilipinas ang ginhimo agud maproteheran ang kinamataron sang magkatuhay nga bahin, agud mapabilin ang patas kag produktibo nga koneksyon sa lugar sang trabaho.
Suno kay Atty. Comoro, ang mga employer ay may kinamatarong nga magtalana sang mga patakaran, magdesisyon sa operasyon, kag siguruhon nga maayos ang dalagan sang negosyo. Apang, kinhanglan man nila nga binag-binagon ang mga kinmatarong sang mga empleyado kaangay sang insakto nga sweldo, safe nga working environment, kag proteksyon batuk sa diskriminasyon kag sala nga pagtratar.
Pahayag pa nya, sa pihak nga bahin, ang mga empleyado ang may obligasyon man nga tumanon ang mga patakaran kag mangin responsable sa ila nga mga trabaho agud mapabilin ang salig sang ila nga mga amo. May yara man sila sang kinamatarong nga ipahayag ang ila nga mga luyag ipalab-ot kag magpangita sang insakto nga solusyon sa mga problema sa trabaho.
Sa idalom sang Labor Code kag iban pa nga kaangot nga layi, ginaproteheran ang interes sang duha ka bahin agud malikawan ang mga indi pag-intindihanay kag kag gamo sa trabaho.
Dugang pa sang natungdan, sa pihak sang mga pagpanghangkat sa patag sang trabaho, nagapati ini nga ang pag-angkon sang bukas nga komunikasyon kag pagtuman sa layi ang yabe agud mapabilin ang maayos nga relasyon sang employer kag empleyado.
Interviewed by Bombo Roadnie Daban Dalanon
