Gin-ako sang actor kag komedyante nga si Vice Ganda nga wala siya sang plano nga magtambong sa 2025 Metro Manila Film Festival (MMFF) Awards Night, apisar nga nagdaog siya sang Best Actor sa pelikula nga “Call Me Mother”.
Suno kay Vice, talagsa lang siya nagatambong sa mga seremonya sang paghatag sang pasidungog sa MMFF, nga nagasiling nga ang nasambit nga okasyon masami nga nagakatabo sa tion sang iya bakasyon upod sa iya iloy.
Sa una nga adlaw sang shooting para sa “Call Me Mother,” ginsiling niya sa iya direktor nga si Jun Lana nga indi siya magtambong sa awards night.
Nagbag-o lang ang iya desisyon pagkatapos nga ginhambalan siya sang iya boss, nga suno kay Vice, nagpahanumdom sa iya nga ang pagtambong sa awards night indi bangod nagalaum siya nga magdaug, kundi agod suportahan ang lokal nga industriya sang pelikula, ang festival, kag ang iya mga kaupod nga artista.
Bangud sini, napilitan si Vice nga magtambong kag nagpangayo pa sang bulig sa styling team sang iya co-star nga si Nadine Lustre para sa iya look for the night.
Magluwas sa Best Actor award ni Vice Ganda, ang “Call Me Mother” nagdaug man sang Third Best Picture, Best Child Performer, kag Gender Sensitivity Award sa 2025 Metro Manila Film Festival Gabi ng Parangal.
