PONTEVEDRA CAPIZ – Nagdepensa ang Municipal Administrator sang Pontevedra sa wala pag-aprobar sang Sangguniang Bayan sa paga-utangon nga P24-M nga ibakal kun tani sang mga dump truck.
Sa interview sang Bombo Radyo kay Mr. Jong Tumlos ginpaathag sini nga kung pila ang pinal nga presyo sang truck ini lamang nga kantidad ang ipaguwa sa bangko, kag luyag man nila nga may brand ang salakyan agud madugay kag indi madali masamad.
Suno pa kay Tumlos nga indi savings ang ginatumod nila nga P13-M nga mahimo tandogon bangud nakaalokar na ini sa mga programa bangud ang pondo ang nagikan sa 20% sang ila nga banwa.
Aminado naman ang administrador nga may mga balayaran pa ang munisipyo sa gasolinahan, catering, kag sweldo sa mga job orders, apang ginklaro sini nga normal lang nga gakatabo ina sa Local Government Unit kag ginapasiguro nga mabayaran tanan.
Dugang pa ni Tumlos nga tuman nga kinahanglan ang bag-o nga mga dump truck para sa paghakot sang mga basura bangud isa na lamang ang naga-operate.
Samtang ginpasiguro man sini nga pananglitan indi ma-aprobahan ang loan sa bangko, magapangita sila sang paagi agud makabakal sang bag-o nga mga dump truck.
