Ginbatikos online ang isa ka AI-generated nga laragway ni US President Donald Trump kun sa diin siya ang nakasuot sang suksok nga pang-Papa, pila ka adlaw bag-o ang pagsugod sang conclave sa Vatican agud mamili sang bag-o nga Santo Papa matapos magtaliwan si Pope Francis sadtong nakaligad nga bulan sa edad nga 88.
Makita sa litrato si Trump nga may seryoso nga itsura, nagapungko sa isa ka mahumok nga pulungkuan, nagasuksok sang puti nga mga panapton kag isa ka mitra, samtang nagabayaw sang isa ka tudlo.
Gin-post niya ini sa Truth Social, kag gilayon ini nga gin-repost sang opisyal nga account sang White House.
Suno sa obispo sa New York, subong man gikan sa pila ka mga konserbatibo nga grupo nga nagapamatok kay Trump, gintawag nila ini nga “insulto” kag “insulto sa pagtuo” sang Simbahan Katoliko.
Samtang, nagpamalibad naman ang Vatican nga maghatag sang komento sa nasambit nga isyu.
Una na nga nag-joke si Trump nga luyag niya mangin Papa, kag ginsambit niya si Cardinal Timothy Dolan bilang isa ka “maayo nga kandidato”, bisan pa nga wala sia sa listahan sang mabaskog nga mga kandidato para sa pagkapapa.
