Pormal nga ginturn-over sang Land Transportation Office (LTO) Region VI sa Roxas City Government ang AI Traffic Signalization System nga ginapaabot nga makabulig sa mas episyente nga pagdumala sang trapiko sa syudad.
Personal nga ginturn-over ang proyekto ni LTO Region VI Regional Director Atty. Gaudioso P. Geduspa II kaupod si Atty. Allan Sacramento, Acting Chief sang LTO City District Office.
Suno sini, dako nga bulig ang AI Traffic Signalization sa pagmonitor kag pagregulate sang dalagan sang mga salakyan sa nagkalain-lain nga bahin sang syudad, ilabi na sa mga lugar nga masami naka eksperyensya sang traffic congestion.
Ginpahayag man sang city government ang pagpasalamat sa LTO bangud sa paghatag sang nasambit nga proyekto nga nagatinguha mapauswag ang traffic management system sang Roxas City.
Sa masunod nga mga inadlaw, magapatigayon naman sang demonstration ukon testing sang AI Traffic Signalization System agud masiguro ang epektibo nga operasyon sini antes ini gamiton sing bug-os sa syudad.
Ginalauman sang mga otoridad nga paagi sa bag-o nga teknolohiya, mas mangin organisado ang pagdalagan sang trapiko kag mapahapos ang pagbiyahe sang mga motorista kag commuter sa Roxas City.
