Isa ka solido nga team ang igaparada sang Gilas Pilipinas sa second window sang 2025 FIBA Asia Cup Qualifiers nga pagahiwaton sa Nobyembre 21 kag 24 sa Mall of Asia Arena sa Pasay City.
Kumpirmado nga ang pag-abot nanday bigmen AJ Edu kag Kai Sotto ang para pabaskugon ang Gilas squad nga magahampang batuk sa New Zealand kag Hong Kong.
Ini ang ginkumpirmar ni Gilas team manager Richard del Rosario kun sa diin ginpahayag sini nga yara na sa maayo nga kundisyon si Edu nga nagahampang sa karon para sa Nagasaki Velca sa Japan B.League.
Daku ang mabulig ni Edu partikular na sa hampang sang Gilas batuk sa New Zealand nga may mga matag-as nga lineup.
Matandaan nga wala nakahampang si Edu sa first window sadtong Pebrero bangud nagapaayo pa ini sa iya nga injury.
Wala man nasaksihan sa aksyon si Edu sa hampang sang Gilas sa FIBA Olympic Qualifying Tournament sa Riga, Latvia sadtong Hulyo.
Sa karon, may averages si Edu nga 7.1 points, 6.3 rebounds kag 1.7 blocks sa paghampang sini para sa Nagasaki.
