ROXAS CITY – Nagnubo ang nabalhag nga mga aksidente sa dalanon nga nakahinabo sa syudad sang Roxas sang 2023 kumparar sang nanligad nga 2022.
Pahayag ni Police Lieutenant Colonel Francisco Paguia, hepe sang Roxas Component City Police Station nakarekord sang 330 ka traffic accidents sang 2023 mas manubo kumparar sa 360 nga nabalhag sang 2022.
Apisar nagnubo ang aksidente sa dalanon mas mataas naman ang death rate sang 2023 sa diin 15 ang ginbawian sang kabuhi samtang 10 sang 2022 bangud sa disgrasya.
Sa nasambit nga datos, wala diri nalakip ang mga aksidente nga ulihe na nareport kag na-settled na sang magtimbang nga bahin.
Sa pihak sini, ginasiguro ni Paguia ang mas pasangkaron pa police visibility kag checkpoint para sa madasig nga pagresponde.
Pahanumdom ni Paguia sa mga motorista nga mangin responsable nga driver, maghalong kag likawan ang pagbiyahe kun yara sa impluwensya sang makahulubog nga ilimnon agud mapalayo sa disgrasya sa dalanon.
