ROXAS CITY – Nakalinyada na ang mga programa sang mga katapo sang Bureau of Fire Protection bilang pagselebrar sang Fire Prevention Month.
Ang bulan sang Marso ang tuigan nga ginaselebrar sang mga bumbero bilang pahananumdom kag paghalong sa mga pumuluyo nga likawan ang sunog.
Sa interview sang Bombo Radyo kay FO2 Don Anthony Falcis, Information Officer sang BFP-Roxas City Fire Station, agud makalikaw sa sunog nagakadapat nga padumdumon ang mga masunod:
-bantayan ang mga kabataan agud indi malab-ot ang mga butang nga makatuga sang kalayo kapareho sang posporo ukon lighter
-likawan ang pagsuga sang mga laya nga dahon malapit sa balay ukon mga butang nga posible magalapta ang kalayo
-patyon ang baga sang kahoy ukon uling kada tapos magluto
-kun LPG ang ginagamit sa pagluto, siguraduhon nga naka switch-off ang regulator.
Sa pihak nga bahin, subong nga Marso, yari naman ang nakalinyada nga pila ka mga programa sang mga katapo sang bumbero:
-Photo Contest – sa loyal mag partisepar, magsumiter sang inyo obra-maestra sa Office of the Provincial Fire Marshal nga nahamtang sa Pueblo de Panay, Barangay Lawaan, Roxas City indi masobra sa Marso 25.
Siguraduhon nga ang obra-maestra ang masunod ang tema sang BFP subong nga tuig nga “Sa Pag-iwas Sa Sunog, Hindi Ka Nag-iisa.”
-Pagpasundayag sang mga katapo sang BFP – ini ang pagahiwaton sa isa ka dako nga mall sa Barangay Lawaan, Roxas City kun sa diin magapaasundayag ang mga katapo sang bumbero sang ila mga talento, hugot naman nga iga-implementar ang minimum health protocols sang Department of Health sa mga tumalambong.
