ROXAS CITY — Wala sang kamatuoran ang report nga isa ka pito ka tuig nga bata ang diutayan gid lamang nga makidnap sa banwa sang Ivisan, Capiz.
Ini ang nagtuhaw sa ginpatigayon nga imbestigasyon sang Women and Children Protection Desk sang Ivisan PNP may kaangtanan sa ginpabalhag nga reklamo sang ginikanan sang bata sa ila opisina.
Suno kay SPO1 Ma. Fe Umitin, hepe sang WCPD, gin-review nila ang mga kuha sang Closed Circuit Television ukon CCTV Camera sa alegar ginluntaran sang insidente, apang wala sang may nakita nga puti nga van nga nagasunod sa traysikad nga alegar ginasakyan sang bata sang tuyo kuntani ini nga kidnapon.
Ginpahayag man ni Umiten nga sang gin-usisa gid nila sang ulihi sang maayo ang bata, nag-ako man ini nga ginhimu-himo lamang niya ang istorya may kaangtanan diri.
Suno sa bata nga nahimo niya ini bangud sa iya kahadlok nga akigan siya sang iya amay bangud gab-i na siya sang magpauli halin sa eskwelahan.
