Opisyal nga nalakip sa listahan ang Filipina tennis star nga si Alex Eala para sa 2025 Wimbledon Championship sa London.
Ikaduha na ini nga pag-appear ni Eala sa grand slam main draw subong nga tuig.
Sa ika-77 nga ranggo, si Eala ang yara sa listahan sang Women’s Tennis Association kag sigurado nga magahampang sa pinakaprestihiyoso nga grass court tournament sa kalibutan.
Ang opisyal nga draw sa diin mahibaluan ang kasumpong ni Eala sa Hunyo 27, tatlo ka adlaw antes mag-umpisa ang ikatatlo nga grand slam tournament sini nga tuig.
Ang mga humalampang nga nalakip mahimo makasuldod bilang seeded sa main draw, wild card ukon paagi sa qualifying.
Madumduman nga sadtong Mayo, una nga nagpasakop si Eala sa French Open, ang iya una nga grand slam, sa diin napaslawan ini sa una nga hugnat.
