ROXAS CITY – Yara na sa Offfice of the Ombudsman Visayas ang ginpasaka nga administrative kag criminal complaint sang punong barangay sang Barangay Hipona, Pontevedra, Capiz batuk sa anay alkalde sang banwa sang Pontevedera kag pito ka mga SB members kag SB secretary.
Kalakip sa mga reklamo nga ginpasaka ni punong barangay Restituto ”Resty” Oquendo kay anay Mayor Steve Contreras kag SB members nga sanday anay SB member Allan Catalan , Jemelo Benedicto, Ricky Boluso, Armando Blasurca, anay SB member Vivian Daynolo, Ronilo Benliro, Harry Salcedo, Ma. Nena Jackeline Almedia kag SB Secretary Julius Estolano amo ang paglapas sa RA 3019 ukon ang anti graft and corrupt practices act sa criminal complaint kag grave misconduct, grave abuse of authority dishonesty naman sa administrative case.
Wala ginlakip sa ginpasakaan sang reklamo sanday Vice Mayor Nelson ”Gerardo” Oquendo kag SB member Donald Esterban bangud natabuan nga absent sila sang aprubahan sang konseho ang municipal ordinance No. 23-2015 nga nagahatag sang otoridad sa Pontevedra Cockfighters Association nga mag-construct, kag mag-operate sang bulangan sa nasambit nga banwa.
Nahibaluan nga si punong barangay Oquendo ang tag-iya sang bulangan nga legal ang operasyon kag nag-expire ang iya permit to operate, apang sa pihak nga ginproseso sini ang mga dokumento kag nasumite sa talatapan sang alkalde kag Sangguniang Bayan wala ini ginpahanugutan nga ma-renew ang franchise sang iya bulangan.
