ROXAS CITY – Ginkumpirmar ni Atty. Mateo Hachuela akalde sang banwa sang Dumarao nga indi maayo ang ila pagsinalayo sang iya bise-alkalde nga si Dumarao Vice Mayor Bilmar “Bokbok’ Dampog.
Ini matapos nagaguha nga daw kaangay ginakontra ni Vice Mayor Dampog ang alkalde pinaagi sa paghimo kag pagbuya sang mga tinaga nga indi maayo pamatian sang pumuluyo sa ila banwa.
Sa interview sang Bombo Radyo kay Atty Mayor Hachuela, ginpahayag sini nga may mga tawo nga indi matudluan kag indi luyag nga mahambalan gani nagahimo na lamang sang pamaagi nga mantsahan ang iya pangalan.
Suno sa alkalde, ang ini nga mga pagbinatasan nagapakita lamang nga indi isa ka cooperative kag team player ang isa ka tawo ilabi na para sa nasakupan.
Bangud sini, gintinguhaan pa nga patung-an ni Capiz Governor Fredinel Oto Castro agud nga mahusay ang mainit nga indi pag-intindihanay sa tunga sang nasambit nga alkalde kag bise-alkalde, apang suno kay Hachuela maayo man sini ang pagpakighinala sa iya ni Dampog sa atubang sang gobernador apang makaligad lamang ang pila ka adlaw liwat naman nga nagabalik ang indi sini maayo nga pagbinatasan.
Ginapunto ni Hachuela ang ginahimo sang iya bise-alkalde sa tion nga makainum sang makahulubog nga ilimnon nga nagapaguha sang mga tinaga nga malain batuk sa iya kag ginasiling nga sarang sini maghalin sa iya linyada kag wala ini nahadlok nga kontrahon ang alkalde.
Ginpakamaayo pa niya suno diri nga ipatawag ang iya bise-alkalde agud hinalaan ang ini nga butang agud kun tani indi na magdako pa kag magdugay ang amu nga isyu apang wala ini nagasugid sang matuod kag nagapakatig-a.
Kaangut sini, ginsiling ni Hachuela nga sa 33 nga ka mga barangay sa ila banwa wala pa sang bisan isa sa ila ang nagpahayag nga luyag sini nila mapahalin ini sa pwesto bilang amay sang Dumarao.
