ROXAS CITY – Gin-athag sang alkalde sang Pilar nga indi basta-basta nga magamit ang P3-milyones nga ginhatag sang Office of the President sa ila nga banwa bangud may yara ini sang guidelines nga ginasunod.
Ini ang ginpahayag ni Pilar Mayor Arnold Perez sang ma-interview sang Bombo Radyo.
Suno kay Perez gina-usisa pa sini kun mahimu bala nga magamit ang kwarta sa pagpa-ubra sang hanging bridge sa naguba nga foot bridge sa Barangay Dulangan.
Ginpahayag ni Perez nga sandig sa guidelines sa paggamit sang P3-milyones, mahimo lamang ini magamit sa foods, medicine kag supplies kag wala diri nalakip ang pagpa-ubra sang tulay.
Bangud diri, ginatinguhaan sini nga makapangita sang pondo gikan sa pila ka mga ahensya agud mangin matalunsay ang pagtabok sang mga manunudlo kag estudyante padulong sa Dulangan National High School.
Sa karon nagahinyo ang alkalde sang paghangop sa mga pumuluyo bangud indi pa gilayon nga makapaubra sang hanging bridge bangud nagakinahanglan pa ini sang pondo.
