TAPAZ, CAPIZ – Indi kumbinsido ang alkalde sang banwa sang Tapaz sa nangin sabat ni CApiz 2nd District Congressman Fredinil Castro kag DPWH Capiz 2nd Engineering District Engineer Dene Baldonado angut sa nadula nga P700 milyones nga pondo para sa road concreting project kag farm to market road sa pila ka mga barangay sang Tapaz.
Ginpahayag ni Mayor Roberto ‘’Nonong’’ Palomar may anomaliya kag iregularidad nga natabo sa pagkadula sang pondo nga napa-in sa mga proyekto sa banwa sang Tapaz.
Ginkwestyon sang opisyal ang ginaalegar pagpatukod sang municipal building kag public market sa banwa sang Dumalag sang DPWH, bangud wala ini sa function sang ahensiya nga pangunahan ang konstruksyon sang nahinambitan nga mga edipisyo.
Suno kay Mayor Palomar sang nagtukod ini sang public market kag ginpa-rehabilitate ang ila municipal building, nagpangutang ini kag ginhimo nga collateral ang 20% development fund sang banwa.
Daku nga palamangkutanon ni Palomar nga nalakip sa national expenditure program ang pondo, apang wala napatuman ang proyekto.
Gindugang pa sang alkalde nga nagpangayo pa ini sang bulig sa national government para mapunduhan ang plano nga pagpahimo sang karsada sa pila ka mga upland barangay sa Tapaz, nga nagadugay sang duha tobtob tatlo ka adlaw ang ila nilaktanay para madala ang ginabaligya nga produkto sa banwa.
Samtang gintadlong ni Mayor Palomar ang report nga may pulitiko nga nagasulsol sa iya.
Suno sa opisyal nga makatindog ini sa kaugalingon nga tiil kag indi kinahanglan ang iban nga pulitiko.
