ROXAS CITY – Amat-amat naman nga nagataas ang numero sang indibidwal nga nagahiwat sang iligal nga aktibidad kaangay na lamang sang iligal nga druga sa syudad sang Roxas.
Ini ang ginpahayag ni PLt.Col. Aron Palomo, hepe sang Roxas Component City Police Station (RCCPS) sang mainterview sang Bombo Radyo.
Kadungan sang pagligwa sang COVID-19 borders kag restrictions amat-amat naman nga nagabalik sa operasyon ang pagduso kag paggamit sang iligal nga droga.
Halimbawa na lang suno diri ang lugar sa Railway St kag Brgy Punta Tabuc kun sa diin subong nga tuig madamo na ang ginkasahan sang drug buybust operation sang mga otoridad kag indi maubos-ubos.
Matandaan nga sang damlag lang, nadakpan sang gintingub nga pwersa sang PDEA Capiz, Aklan kag Guimaras ang napulo ka mga persona nga nagagamit sang iligal nga druga sa nasambit nga lugar kun sa diin walo diri ang nagpositibo.
Suno kay Palomo, nagapatigayon man sang surveillance kag monitoring ang kapulisan sa nagkalain-lain nga lugar, apang mas ginpakamaayo sini nga magpangayo sang bulig sa PDEA bangud kilala na ang mga PNP personnel sang mga iligalista.
Ginasiguro naman sang hepe, nga mas pasangkaron pa sang otoridad ang kampanya batuk sa iligal nga druga kag pagatutukan ang kada brgy nga madamo sang pumuluyo kag posible himuon nga drug den.
