Ginlabo sang isa ka amay ang iya kaugalingon nga bata sa Barangay Mongpong, Roxas City.
Ang biktima amo si alyas “Joy”, 34 anyos samtang ang suspek amo si alyas “Vanie”, 56-anyos nga lunsay residente man sang amo nga lugar.
Sa interview sang Bombo Radyo kay Police Chief Master Sergeant Ramil Arcangeles, Public Information Officer sang Roxas Component City Police Station, iya ginpahayag nga bangud sang cellphone nga nadula , nagsabtanay ang duha kag nagresulta sa mainit nga pagbinaisay kag pagpanglabo.
Suno pa kay Arcangeles, naka-angkon sang pilas ang biktima sa nagkalain-lain nga parte sang iya sini nga lawas.
Gilayon man nga gindala sa ospital ang biktima kag padayon nga nagapaayo.
Sa subong, nakahunong na sa istasyon sang Roxas Component City Police Station ang suspek kag pagapasakaan sang kaso nga attempted parricide.
