ROXAS CITY – Pagapasakaan sang kaso nga incest rape ang amay nga naghimulos sa 17 anyos nga dalagita sa isa ka banwa sa probinsya sang Capiz.
Matandaan nga ginhimo nga sex slave ang 17 anyos nga dalagita sang kaugalingon nga amay nga si alyas Oding, 40 anyos kag isa ka drug surenderer sa sulod sang balay.
Nahibaluan nga makapila na ka beses nga ginhimuslan ang biktima nga si Alyas Inday sa ila balay bangud nagatrabaho sa luwas sang pungsod ang iloy sang biktima kag nabilin ini sa iya amay kaupod ang duha ka mga utod nga lalaki.
Base sa Women and Children Protection’s Desk nga elementarya pa lamang ang biktima sang una nga ginhimuslan sang suspek.
Samtang, nagapabilin nga at-large ang suspek matapos natukiban nga nakasugid ang anak sa mga barangay officials.
Sa karon yara na sa kustodiya sang iya nga tiya ang biktima kag ang duha sini ka mga utod.
