ROXAS CITY – Padayon sa karon nga ginabulong sa isa ka pribado nga ospital sa siyudad sang Roxas ang isa ka amay matapos nga ginlampusan sang kahoy sang iya kaupod sa pagpangtaksay sa Sitio Nipa, Barangay Talon, Roxas City.
Ginkilala ang biktima nga si Hernanie Andrada, residente sang amo man nga lugar.
Suno sa anak sang biktima nga si Angelita Andrada, nagalain ang iya buot bangud sa nadangatan sang amay sini nga nag-angkon sang pilas sa ulo matapos ginlampusan sang suspek nga si Fernando Begona.
Ginpahayag sang ginang nga tuman ang iya kakibot sang gintundaan siya sang anak nga nagpauli nga duguon ang biktima.
Sang iya ini gin-usisa, didto nahibaluan nga samtang nagapangtaksay ang biktima kag ang suspek, natumba si Begona kag nahulog sa irigasyon.
Suno sa ginang nga wala man ginkadlawan sang iya amay ang suspek apang nakibot na lamang ini nga samtang siya ang nagaduyan, ginpalapitan siya ni Begona kag ginlampusan sang kahoy sang makaduha ka beses.
Bangud diri, luyag sang ginang nga pasabton ang suspek kag himuon ang obligasyon sini nga ipabulong ang biktima.
