ROXAS CITY – Pilas sa liog ang naangkon sang amay matapos tuyo kuntani nga agawon sang iya bata ang gina-umbilay sini nga binangon, pasado 10:00 kagab-i, Setyembre 22 sa Barangay Agcagay, banwa sang Jamindan.
Ginkilala ang amay nga si Isidro Barrientos Sr., 57-anyos samtang ang anak sini amu si Isidro Barrientos Jr., 29-anyos residente sang nasambit nga lugar.
Sandig sa impormasyon nga nagikan sa Jamindan Municipal Police Station, samtang naga-inom-inom si Isidro Jr. kaupod ang iya mga abyan hinali nga nag-abot ang iya sini nga ginapahayag hubog nga amay sa iya balay nga gina-umbilay ang binangon.
Nagaguwa sa imbestigasyon sang kapulisan, nga tuyo kuntani kuhaon sang bata ang gina-umbilay nga binangon sang amay agud mapahilayo sa posible disgrasya.
Ginapahayag nagpamalibad ang amay apang nagpumilit ang anak nga makuha kabangdanan agud aksidente nga napilasan ang liog sang amay matapos nahiwa sang binangon.
Ginpadangat naman sa ospital si Isidro Sr. para sa nagakaigo nga pagbulong.
