ROXAS CITY – Desidido nga magpasaka sang reklamo ang amay sang duha ka mga lapsag sa triplet nga napatay matapos ginbun-ag sa Bailan District Hospital sa banwa sang Pontevedra, Capiz.
Sa interview sang Bombo Radyo Roxas kay Mr. Reyland Bataican, ginpahayag sini nga desidido sila nga ipalab-ot sa korte ang nangin kapabayaan sang mga nurses kag doktor sang amo nga ospital nga ginatudlo rason sa pagkapatay sang iya duha ka mga anak.
Suno kay Bataican, wala man siya sang kwarta kag mataas nga lebel sang edukasyon, indi mahimo nga indi mahatagan sang leksiyon ang mag empleyado sang amo nga ospital.
Mahibaluan nga bangud pre-mature ang mga lapsag, ginhambalan sila nga kinahanglan ini mabutang sa incubator.
Apang bangud isa lamang ang available nga incubator, naghimo sang improvised ang mga nurses kag ginbutang sang suga para sa duha ka mga lapsag.
Bangud nanotaran nga nabudlayan sa pagginhawa ang mga lapsag, nagkuha sang ambu bag ang duha ka nurses kag ginbutang sa mga ini.
Apang ginkakibot ni Bataican sang ginhatag sa ila nga duha sang menor de edad sini nga hinablos ang duha ka ambu bag agud sila ang magpadayon.
Matapos nagpangayo sang bulig sa mga nurses, gintsekyar ang pulso sang mga lapsag kag didto ginhambal nga patay na ang mga ini.
Sa karon tuman nga nagakalisod ang pamilya kag desidido nga mahatagan sang leksiyon ang nasambit nga ospital.
