Wala sang bisyo kag nagatuman sa iya mandu ang nangin panaysayon sang amay sang lalaki nga nadakpan sa ginkasa nga buybust operation sang mga otoridad sa Barangay Dumulog, Roxas City.
Sa interview sang Bombo Radyo kay Tatay Lito Pactor Sr., amay sang suspek ginpahayag sini nga waay suno diri sila sang may ginahawiran nga armas, waay man sini nakita nga gadala ini sang armas sa iya bata.
Dugang pa sini nga nagguwa sa ila balay ang suspek bangud ginsugat ini sang iya abyan, wala nya suno diri ginpasugtan ang iya bata nga maglakat apang wala gid ini nagpapugong kag naglakat nalang sang hipos.
Wala magdugay nabal-an nalang ni Tatay Lito nga gindakop na sang mga otoridad ang iya bata kag may nakuha nga armas sa iya sini nga paghinakop.
Dako man ang katingalahan ni Tatay Lito kun sa diin nakuha sang iya bata ang amo nga armas apang sa pagkahibalo sini, wala man ini sang may ginahawiran nga armas.
Nagapati man ini nga gin-set up lang ang iya bata nga himuon ang amo nga butang sang mga indibidwal nga yara sa likod sini.
Matandaan nga nadakpan si Lito Pactor Jr., matapos ang ginpatigayon nga buybust operation sa Barangay Dumulog, Roxas City.
Nakuha sa paghinakop sini ang 1 unit sang homemade twelve-gauge shotgun nagaduag silver kag itom, P500.00 nga buy-bust money, kag 3,000.00 nga boodle money.
Kaso nga paglapas sa R.A. 10591 ukon Comprehensive Firearms and Ammunition Act ang paga-atubangon sang nadakpan.
Sa karun, nagapabilin ini sa kustodiya sang Roxas City PNP para sa nagakaigo nga disposisyon.
