ROXAS CITY – Posible nga napikon ang isa ka amay bangud sa wala katapusan nga pagsukma sa iya sang anak, rason nga iya ini ginbuno sa sulod sang ila balay sa banwa sang Ivisan, Capiz.
Padayon nga ginabulong sa ospital ang biktima nga si Jomar Magbanua 39-anyos matapos mabun-an sang suspek nga ama nga si Mario Magbanua, 64-anyos sang Sitio Pagutok Ilaya Ivisan, Ivisan, Capiz.
Nagaguwa sa imbestigasyon sang mga pulis may ginaubra ang suspek sang mag-abot ang hubog nga biktima.
Wala ginalauman, nagpalapit ini sa amay kag ginkumpronta sa iya nga pagkasugarol.
Diri nagsugod ang away sang mag-amay tobtob ginsumbag sang biktima ang amay nga natumba.
Bangud diri, ginbuno sang amay ang anak sa dughan.
Gilayon nga gindala sa ospital ang biktima samtang gin-aresto sang mga pulis ang suspek nga nakapreso na karon sa bilangguan.
